The Best of my 2011

Nainspire ako ng ginagawa ni Kateh every year. Oo nga naman, pag nilista ko ang mga landmarks ng aking taon, mas madaling magpasalamat, mas madaling maaninag ang dapat puntahan. Kaya heto ang top 10 ng aking 2011, habang hinihintay ko ang pagdating ng 2012.

1. “Ikaw ang Pag-ibig.” Higit sa dalawang taon ng paggawa, ang huling obra ng aking maestrang si Marilou Diaz-Abaya ay natapos sa pagsisimula ng 2011. Ipinagmamalaki kong naging bahagi ako ng pelikulang ito. Bagamat dahil sa proyektong ito, nagretire na ako sa pagiging Assistant Director, hindi ko malilimutan ang lahat ng natutunan ko sa lahat ng nakatrabaho, lahat ng tumulong, lahat ng kumontra, lahat ng sumuporta, at higit sa lahat, sa pagpapaubaya at pagtitiwalang binigay sa akin ng aking maestra.

2. Ang Pagbabalik ni Mang Serapio. Hindi na kami nagsawa. Pangatlong rerun na ata ito. Bagamat wala na ang squatters’ area na entrance, naroon pa rin ang angas, ang lupit, ang dugo, ang pawis at baho ng dula. Ang pinakamagandang dulang ipinalabas sa UA&P ayon sa maraming respetadong guro sa UA&P, tunay na malupit na alaala ang Paglilitis kay Mang Serapio.

3. Dae X Machina. Dahil nagshoot kami ng teaser-trailer ng Serapio, narealize namin ni Dae na kaya palang magsulat, magshoot, mag-edit, mag-score, at magpost sa youtube ng maikling pelikula all in one night. Simula noon, gumawa na kami ng sangkatutak na maiikling kalokohan na pelikulang sabog at walang katuturan. Mapapanood sila sa youtube, hanapin lang ang channel na daexmachina. Ito rin ang naging simula ng aking mas seryosong kolaborasyon kasama si Dae.

4. Jose Rizal at iba pang Indie Films. Dahil sa ahente kong si Jourdan, natambakan ako ng mga kailangang sulatin (although hindi pa rin ako nababayaran sa lahat). Ilan dito ay ang “Jose Rizal: The First Hero”, na malupit ang kinalabasan ng trailer, “Alamat ng Kamao” na sinulat ko sa loob lang ng 24 hours, “Train Ride” na koleksiyon ng maiikling pelikulang nagtatagpo-tagpo sa tren na binubuo ko para kay Epy Quizon, at ang naunsyaming “Pangayaw.” Ngayong taon rin una akong nagco-produce ng short film ni Greg na “Mami” na maganda ang pagtanggap ng mga manonood at kritiko. Masayang-masaya ako sa pagkakaedit ko dito ng pelikula ni Greg. Isa pa sa mga inedit ko ay ang cute na “First Kiss” ng kumare kong si Cia.

5. Overmind. Hindi ko maintindihan kung bakit ngayon ko lang naisip magtayo ng kumpanyang kumikita. Ang overmind ang palatandaan na itinatakwil ko na ang aking pagiging starving artist at ang pagyakap ko sa nais kong maging prosperous artist. Kailangang kumita para masuportahan ang art kaya kasama si Dae, JJ, Greg at Jonathan (okay pati si Ian pero nasa iloilo kasi siya noon nung formally naming tinayo), tinayo ko ang Overmind, isang creative consulting company na walang ibang ginagawa kundi ikwento ang kwento ng cliente sa kanyang audience. So far okay naman. Dalawang cliente pa lang pero malaki at maraming proyekto. Sana tuluy-tuloy na ito.

6. Makbet. Hindi ko alam kung ano ang pumasok sa kukote ko at naisip kong talunin ang pagsasalin ni Rolando Tinio ng Makbet. Kaya ngayon, malapit na akong matapos sa aking bagong pagsasalin ng makbet na may tugma at sukat. Ipalalabas ng dulaang Roc ngayong enero. Dito, marami rin akong nakilalang bagong mga kaibigan at natuklasang bagong mga talento. Ang saya-saya. Sana matapos ko na ang script. Pakshet malapit na ang shows.

7. Maria. Ang pagsilang ng soon-to-be na inaanako ko, si Maria, anak ni Cia at Ferdie. Sa lahat ng stress ko ngayong 2011, iba lang ang pakiramdam tuwing karga-karga ko ang batang ito. Para bang hiyang na hiyang ang aking mga braso sa pagbubuhat ng sanggol. Ang pinakamemorable moment ko with Maria: noong dumalaw ako sa ospital at bagong silang pa lang siya, kinarga ko siya. Biglang ginalaw niya ang ulo niya at labi patungo sa aking dibdib na parang naghahanap ng suso. Nang wala siyang maisubong suso para sa gatas, bigla siyang umiyak, at nagpanic ako. “Gatas daw! Sorry, maria, wala ako nu’n.”

8. Fast-Breakfast Club. Ngayong taon din, sa wakas, naisipan at tinuluyan na rin namin ang pag-eexercise. Tuwing 630am ng linggo, nagpipilit kaming magbasketbol at magbanat ng konting buto. So far, so good. Regular na ang aming pagtutunggali sa court na sinusundan ng masarap at masaganang brunch…kaya balewala ang carbs na sinunog. 

9. Virgin Labfest at Writers’ Bloc. Hindi man ako nanalo sa Palanca ngayong taon, nakapasok naman ang dula ko sa VLF 7 na sa tingin ko’y mas makabuluhan dahil nagkaroon ako ng pagkakataong magsadula ng sarili kong gawa sa entablado ng CCP! Hindi masyadong maganda ang review ng ilan sa internet, ang iba nama’y nalito, may iba namang sobrang nabigatan at may ilang nagandahan. Kung anuman ang naging reaksiyon, isang malaking bagay na mabinyagan sa CCP upang malait at makatay ng mga eksperto at mga manonood. Marami akong natutunan sa pagsusulat at pagdidirehe, at pag-intindi sa audience sa festival na ito. Dahil din sa Labfest, nakilala ko ang mga taga-writers’ Bloc. Ngayon, kasali na nila ako sa katayan ng mga dula. Balak kong samantalahin ang mga utak ng aking mga kasama dito para sa ikauunlad ng aking pagsusulat.

10. IUTA at Nick Lizaso. Ngayong taon ko rin nakilala ang batikang direktor na si Nick Lizaso at ang International University Theater Association. Ang matagal na naming pangarap ni Roni for ACASIA ay matagal na palang ginagawa ni Nick. Ngayon, nagtutulong kami para makagawa ng mga proyektong tinitibok talaga ng aming puso at kinakalam ng aming sikmura. Nito lang nakaraang buwan, lumipad kami ng Palawan para magbigay ng workshop. Eto ang trabaho. Work and pleasure, at the same time. Wagi!

Ano ang nakaabang sa akin ngayong 2012? Sabi sa isang feng shui book na nasilip ko kagabi sa bookstore, heto na. Heto na ang taon kung kelan dapat magsimula ng bagong relasyon. Totoo kaya? Tignan natin. Pero mukhang mas mataas pa ata ang posibilidad na manalo ako ng Palanca Hall of Fame in one night kaysa mainlove ako this year. Ayuz!

Happy New Year! 

Kung minahal mo ako o mahal mo pa rin ako…

basahin mo ito.

Kung ikaw ay nabibilang sa mga sumusunod na kategorya:

1. Isa ka sa mga nabaligtad ang pananaw sa buhay dahil sa pangaral ng tatlong utos.

2. Isa ka sa mga natutong magmahal o magpakabitter dahil sa mga dula kong nabasa mo.

3. Isa ka sa mga kamag-anak kong concerned sa pagiging starving artist ko.

4. Isa ka sa mga nag-aabang ng mga bago kong susulatin pero medyo naaatat na dahil wala pa akong nasusulat lately (kaya kailangan mong basahin ito hanggang dulo).

5. Isa ka sa mga inaanak kong pinagkakautangan na ng malaki at masyado ka nang matanda para bigyan ko ng barbie o g.i. joe (o mas malaki pa ang sweldo mo sa’kin ngayon)

6. Isa kang kamag-anak na mayaman at naniniwala sa potensiyal nitong prodigy ninyong kamag-anak na nagugutom

7. Isa kang kabarkada o college friend na mataas na ang posisyon sa lipunan at pinakopya kita nung college kaya ka nakarating kung nasaan ka ngayon

8. Isa kang katropang tinulungan sa love life kaya panalo ang syota mo habang ako’y malamig ang pasko.

9. Isa kang dati kong estudyante na maraming napulot sa akin sa klase man o sa labas na higit pa sa binayad mong tuition

10. Isa kang patron of the art at big fan ko.

Kung isa ka sa mga nakalista sa itaas, nasa ibaba ang listahan ng mga pwede mong iregalo sa akin ngayong pasko.

LIBRO/COMICS:

1. “A Song of Ice and Fire” (buong set) by George R. R. Martin.

2. “Steve Jobs” by Walter Isaacson

3. “Trese” Volumes 1-4 by Tan and Baldisimo

4. “Mga Panibagong Kulam” by Tony Perez

5. “Mga Panibagong Ritwal ng Wicca” by Tony Perez

6. “Mga Panibagong Kulam sa Pag-ibig” by Tony Perez

7. “Pagsubok sa Ilang: Ang Ikaapat na Mukha ni Satanas” by Tony Perez

8. “Laughable Loves” by Milan Kundera

9. “Amadeus” by Peter Shaffer

10. “Hunger Games” by Suzanne Collins

GADGETS/GEAR/EQUIPMENT

1. iPad 2

2. or iPod Touch

3. Macbook pro or iMac

4. Slider

5. 5mm cannon lens or carl seiz and an adaptor

6. Magandang Camera Bag.

MISC

1. Girlfriend.

O, alam nyo na. Pagkakataon nyo nang bumawi sa lahat ng napala ninyo sa akin. :P

Maligayang Pasko. 

Unsex Me Here (may tugma’t sukat)

LADY MACBETH:

Ang uwak mismo’y namalat
Sa paglalahad ng ulat
Nitong madugong pagdaong
ni Duncan sa aking bubong.
Hali kayo kaluluwang
bantay ng aming haraya,
Hubarin ang kasarian
at ako’y inyong damitan
mula ulo hanggang paa
saplot ng kawalang-awa.
Ang dugo ko’y palaputin:
Barahan ninyo’t harangin
Daluyan ng alinlangan,
upang walang makahadlang
na anumang pagkahabag
sa nangingitim kong balak.
Sumuso sa aking dibdib,
ministro ng kamatayan
Gatas ko’y gawing mapait
Sa’n man kayo nag-aabang
Sa n’yong bulag na pag-iral
Pagkagat ng kasamaan.
Halina, gabing kulimlim
ikubli ako sa dilim,
sa sulasok ng impyerno,
ako ay iyong itago
upang hindi na matanaw
ng matalim kong balaraw
sugat nitong iguguhit
at nang di rin makasilip
ang lahat sa kalangitan
sa kumot ng kadiliman
at hindi makatangis ng:
“Tigil! Huwag! Sandali lang!

let’s see you conspire, universe!

So I was walking with Mon in Greenbelt. We were talking intently about our plans to conquer the world and change the face of the country when suddenly…

i feel a soft tap on my back. three fingers. exactly. i felt them. gentle. and i knew, they were from a woman.

i turn my back.

i freeze. i am dumbfounded.

i see the most gentle face i have not seen in seven and a half lifetimes.

she smiles.

she hands me a scarf.

my scarf. 

“you dropped this.”

smile.

“and your bag is open.”

smile.

pick up line! i need a pick up line! i have an entire library of them! quick! wit! i order you! think of a line! YOU NEED TO GET HER NUMBER! GADEMITT!!! OR YOU’LL NEVER SEE HER AGAIN!!!

all i could say was

“thanks.”

she leaves. I stare at her back.

where the fuck did all my powers of rhetoric go?

and i call myself a writer.

now let’s see if coelho is all bullshit. let’s see if i can will the universe to conspire so we can cross paths again.

this time, my scarf is the pickup line.

Macbeth’s Dagger Speech (may tugma’t sukat draft 1)

Balaraw ba itong nasa’king harapan,

tinuturo ako ng kanyang hawakan? 

Halika, pahawak—

Di kita maangkin ngunit nar’yan ka pa.

Natatanaw lang ba at di nalalasap, 

Itong pangitaing hinain sa palad?

O balaraw ka ba sa aking isipan, 

isang panlilinlang na likha ng diwang

inapi ng init at ng alisangsang?

Natatanaw kita, sintalas, sintahas

nitong balaraw na aking ilalabas.

Inaakay mo’ko sa’king tatahakin,

at hawig mong punyal, aking gagamitin.

Mga mata’y tanga dahil sa pandama,

O sa mata lamang dapat magtiwala:

Nariyan ka pa rin!

Dugo sa patalim ay wala kanina!

Hindi ka totoo!

Madugo kong balak ang lumilikha

ng gan’tong deliryo.

Habang patay lahat sa hating daigdig,

Ginagahasa ng buhong panaginip

ang tagong pag-idlip; Mga mangkukulam

ay nagdiriwang sa alay ni Hecate;

Lantang Kamatayan, ngayo’y nagmumulto

Tangay ng alulong ng bantay n’yang lobo,

kasabay ng tiyak na hakbang ni Tarquin,

marahas na gapang patungong layunin.

Matatag na lupa, mabingi sa yapak,

huwag mong pakikinggan, kung saan tatapak

ayokong ibunyag ng bato at bitak

kung saan mang lubak paa ko’y tatahak,

Hubdin ang hilakbot na suot ng gabi—

Habang nagbabanta, siya’y naghahari;

Pinalalamig lang ng mga salita

itong nagniningas kong balak at gawa

[tutunog ang kampanilya]

Ako ay tawag na nitong kampanilya

Wag pakinggan, Duncan, ang iyong agunyas

na tawag ng langit, o kaya’y Satanas 

Lady Macbeth’s “unsex me here” speech (draft)

Paos ang Uwak na humuhuni

ng madugong pagdaong ni Duncan

sa aking tahanan. Halina, mga demonyong

namamahala sa mortal naming dalumat,

hubdan ako ng kasarian 

at damitan, mula ulo hanggang paa,

ng nakapanghihilakbot na kalupitan;

palaputin ninyo ang aking dugo;

Daluyan at daan sa pagsisisi’y barahan

upang di mayanig ng pagdalaw ng alinlangan

ang maitim kong balak

at humadlang sa mga nais kong maganap!

Halina’t sumuso sa aking dibdib, mga ministro ng kamatayan. 

Pait ang aking gatas, 

saan man kayo sa inyong bulag na pag-iral nag-aabang ng malas. 

Halina, gabing kulimlim,

ikubli mo ako sa pinakamadilim na usok ng impiyerno

upang di masilayan ng matalim kong kutsilyo

ang sugat na iguguhit nito,

at nang di makasilip ang langit sa kumot ng karimlan 

at tumangis ng “Tigil! Sandali lang!”

Macbeth’s Dagger Speech (revised)

Balaraw ba itong nasa aking harapan,

tinuturo ako ng kanyang hawakan? Halika, pahawak—

Hindi kita makuha ngunit nariyan ka pa.

Nasisilip ka lamang ba at hindi nalalasap, pangitaing hain ng palad (tadhana)?

O isa kang balaraw ng diwa, panlilinlang na likha nitong

isipang inapi ng alisangsang?

Nariyan ka pa, sintahas nitong balaraw na aking inilalabas.

Inaakay mo ako tungo sa landas kong tatahakin,

at kawangis mong balaraw ang aking gagamitin.

Ginagawang tanga ang aking mata ng aking pandama,

di kaya’y mata lamang ang tanging mapagkakatiwalaan: Nariyan ka pa;

sa iyong talim at hawaka’y bahid ng dugo na wala riyan kanina.

Hindi ka totoo!

Itong madugo kong balak ang lumilikha ng ganitong deliryo.

Ngayon, sa kalahati ng daigdig, kalikasa’y patay

at hinahawi ng palalong panaginip ang mga tagong pag-idlip;

Ipinagdiriwang ng mga mangkukulam ang mga alay ni Hecate;

Tawag ng alulong ng kanyang lobo, mala-multong lumulutang ang lantang Pagpaslang,

kasabay ng tiyak at marahas na panggagapang ni Tarquin, 

patungo sa kanyang layunin. 

Tiyak at matatag na lupa, mabingi ka sa aking mga yapak,

huwag mong pakinggan kung saan ako tatapak,

natatakot akong ibunyag ng mga bato kung saan ako tatahak,

hubarin mo ang hilakbot sa katahimikang suot ng hatinggabi,—

habang ako’y nagbabanta, siya’y buhay; Pinalalamig lamang ng salita ang nagniningas kong gawa.

Hahayo na ako, ako’y tinatawag ng kampanilya.

Nawa’y di mo marinig Duncan sapagkat ito’y agunyas

na tumatawag sa iyo sa langit, o sa lungga ni Satanas.

30-day Haig Microfiction Challenge - Day 13

Word: Sagad.

Sinagad ni Tatang. Namatay sa sarap.

Sinagad ang puyat bago mag-exam. Patay.

Macbeth’s Tomorrow Speech

Ang Bukas, at ang bukas, at ang bukas

ay dahan-dahang gumagapang

nang walang direksiyon araw-araw

hanggang sa kahuli-hulihang kataga ng kasaysayan;

at nililiwanagan ng ating mga kahapon ang mga mangmang

patungo sa kanilang marusing na kamatayan.

Tigil na, maikling kandila!

Ang buhay ay naglalakad na anino;

isang aktor na nag-uubos ng oras sa entablado,

at di na masisilayang muli pagkatapos; isa itong kwento ng tanga,

puno ng ingay at poot, na wala namang katuturan.

Macbeth’s Dagger Speech

Gumagawa kami ngayon ng bagong pagsasalin ng Macbeth. Sa baba ang unang draft (halos transliteration) ng Dagger Speech ni Macbeth. Hindi ko pa ito pinag-iisipan at ineedit. Kumbaga sa piano piece, sight-reading ito. So heto ang aking unang sight-translate ng Dagger speech ni Macbeth. Abangan ang mala game of thrones meets sucker punch staging ko nito this december or february.

Balaraw ba itong nasa aking harapan,

tinatawag ako ng kanyang hawakan? Halika, pahawak—

Hindi kita makuha ngunit nariyan ka pa.

Hindi ka ba bangungot ng pandama tulad ng bangungot ng mata?

O isa kang balaraw sa dalumat, mapanlinlang na likha nitong

isipang inapi ng alisangsang?

Nariyan ka pa, sintahas nitong balaraw na aking inilalabas.

Inaakay mo ako patungo sa tatahakin kong daan,

at kawangis mong balaraw ang aking kagamitan.

Ginagawang tanga ng aking mata ang aking pandama,

di kaya’y mata lamang talaga ang aking kailangan: Nariyan ka pa;

sa iyong punyal ay bahid ng dugo na wala riyan kanina.

Hindi ka totoo!

Itong madugo kong balak ang lumilikha ng ganitong deliryo.

Ngayon, sa kabilang kalahati ng daigdig, kalikasa’y patay

at hinahawi ng palalong panaginip ang mga tagong pag-idlip;

ngayon, ipinagdiriwang ng mga mangkukulam ang mga alay ni Hecate;

Multong lumulutang ang lungayngay na pagpatay,

kasabay ang tiyak at marahas na paghakbang ni Tarquin,  

bantay ang alulong ng lobo patungo sa kanyang layunin.  

Tiyak at matatag na lupa, mabingi ka sa aking mga yapak,

huwag mong pakinggan kung saan ako tatapak,

natatakot akong ibunyag ng mga bato kung saan ako tatahak,

hubarin mo ang hilakbot na kapatid ng oras, na ngayo’y balot nito—

habang ako’y nagbabanta, siya’y buhay; Wika ng malamig na hininga sa nagniningas na gawa.

Hahayo na ako, ako’y tinatawag na ng kampanilya.

Nawa’y di mo ito marinig Duncan sapagkat ito’y agunyas

na tumatawag sa iyo sa langit, o sa lungga ni Satanas.

Gumawa po ba kayo ng sequel ng twenty questions?

i tried. di ko kinaya. i decided to just move on to other more exciting themes. and hopefully more mature :D

Shoot me.

Kung itutuloy mo ang ending ng Twenty Questions, anong gagawin ni Jigs kay Yumi? :)

Alam ko ang gagawin ni Jigs kay Yumi. Pero hindi ko sasabihin. Kaya nga tinapos ko na sa “dilim” :P

Shoot me.

Anti-Jejenese and Bekimon Act of 2011

Abangan: ito ang susunod na batas na ipapasa ni Winston Castello:

(Disclaimer: kundi kayo nakakaintindi ng sarcasm, huwag nyo itong irereblog)

Be it enacted by the Senate and House of Representatives of the Philippines in Congress assembled:

SECTION 1. This Act shall be known as the “Anti-Jejenese and Bekimon Act of 2011”.

SEC. 2. A universal Code of Student Discourse is hereby prescribed where Jejenese and Bekimon as a form of communication be strictly prohibited and appropriate sanctions be applied for violations thereof.

SEC. 3. Under this Act, jejenese and bekimon is when a student or group of students utilizes the bastardization of the Filipino language called Jejenese, usually used by jejemons / jejemonsters, where words are created by rearranging letters in a word, alternating capitalization, over-usage of the letters H, X, or Z, and silent letters; and Bekimon, usually but not exclusively used by gays or girly gays that speak “gay lingo” in an enhanced manner, especially where such an act is used as a form of redress of grievance against government.

SEC. 4 Every bonafide student from any school, college or university shall conduct himself with high degree of discipline and propriety.

SEC. 5. The Department of Education in the case of elementary and high school students and the Commission on Higher Education in the case of college students shall draft a universal Code of Student Discourse to carry out the provisions of this Act.

Further, DepEd and CHED, respectively shall issue appropriate rules and regulations to effectively carry out intent and purpose of this Act.

SEC. 6. This Act shall take effect ninety (90) days after its publication in the Official Gazette and in at least three (3) newspapers of general circulation.